‘Steddfod Unnos 2025
Y Cerddi Buddugol
Diolch i’r beirdd am roi’r hawl i’w rhannu.
Y Beirniad
Y Prifardd Tudur Dylan
Enillydd y Gadair – Gruffudd Antur
CYWYDD – ‘LLINACH’
Llinach
Gynt roedd ywen yng Nghenarth
yn mynnu tyfu’n y tarth;
tyfodd tra llifai Teifi
yn ddwfn, ddwfn i’w gwreiddiau hi.
Mi wn mai’n union ’run modd
y safai â phan safodd
yn Nheifi iôr Dinefwr
ac yfed, yfed o’i dŵr.
Ni wn sawl hogyn annoeth
dan hon fu’n gwrido, yn noeth
fel yr hen ywen ei hun,
dod i oed, a mynd wedyn.
Ond gwn fod ein doeau i gyd
yn Nheifi; mi wn hefyd
fod ym mhren yr ywen rin
a pharhad anghyffredin,
a heno, gwn, fesul gair,
daw hen goedyn yn gadair.
Yn ail – Emyr Davies
HIR A THODDAID – i unrhyw grwp pop
Ail Symudiad
Yr un yw’r lle, y dre llond o droeon;
Yno awn ni, heb ei throi’n ganeuon;
Heibio’n dreifo heb glywed yr afon
Na sŵn chwibanu yr adar duon.
O leiaf o’r Red Leion ar brydie
Daw hwythe’r geirie’n llawn hiraeth gwirion.
Yn drydydd – Manon Wynn Davies
Englyn i Gastell Aberteifi ar achlysur 850 mlynedd ers ei adeiladu
Castell Aberteifi
Yn rhad, rhoi addurniadau – anfon gwŷs:
‘Dewch i’r llys â’ch lleisiau’
i enw Rhys gael parhau
yn olion yr hen waliau.
Enillwyr Categoriau Eraill
Y Gwpled – i’w arddangos yng Nghastell Aberteifi
– Steffan Phillips
Mae Rhys rhwng y muriau hyn…
’whiliwch ym mhob cornelyn.
Englyn Ysgafn – ‘Cystadlu’ – Eurig Salisbury
Cystadlu
Dau fardd pig yn gweiddi gwarth – yn yr hwyl
Yng ngwledd Rhys fu’n cyfarth:
‘Ti’n gnaf, a ti’n genau arth!’
‘Ti yw hobbit Deheubarth!’
TRIBAN yn cynnwys y gair ‘Arglwydd’ – Jo Heyde
Rhoes waddol i’r Nadolig
â’i waliau bendigedig,
yr Arglwydd Rhys a dalodd saer
i’w gaer gael bod o gerrig.
Pennill Telyn – Gwelais Roces / Rocyn o Gilgerran
– Eurig Salisbury
Gwelais roces o Gilgerran
Wrthi’n tanio’i phedair injan
Cyn cynhyrchu clamp o gwmwl …
Sori, roced o’n i’n feddwl.
Uchafbwyntiau eraill
Nannw Maelor
Hir a thoddaid: i unrhyw grwp pop
The Beatles, ‘Now and Then’
Er diflannu deryn du, distewi’r
Hediad olaf a’i alar, daw eli;
bob hyn a hyn, harmoni – sy’n atsain
ei llef fel adain i’w holl faledi.
Non Lewis
Triban yn cynnwys y gair ‘Arglwydd’
Triban: yn cynnwys y gair ‘Arglwydd’
Yng nghastell Aberteifi
fe chwifiwn ein baneri,
a dathlwn gyda’r Arglwydd hael
o gael dod at ein gili’.